Charisma, ’n ekstra suiwer olyfolie uit Calitzdorp in die Klein-Karoo, is pas aangewys as een van die 2024 Absa Top 10 Olyfolies. Dis die Charisma 2 Delicate wat die eer gekry het – ’n produk van Ouma Se Huis Boutique Olive Estate, ’n plaas met diep familiegewortelde geskiedenis en ’n passie vir gehalte.

Wat dié olie so spesiaal maak, is die sorg waarmee die olywe gekweek en geoes word. Elke stap – van boom tot bottel – word versigtig beplan sodat net die beste, onbeskadigde vrugte gebruik word. Die 2024 oes het danksy goeie reën baie mooi afgelewer, wat ’n groot rol gespeel het in die olie se topgehalte. In dié deel van die Karoo is water nie altyd volop nie, so toe die natuur en mens saamwerk, het dit die perfekte resep vir sukses geword.

Ouma Se Huis is vandag in die hande van Carin Nel Swanepoel, wat die plaas by haar oupa, prof. P.C. Nel, oorgeneem het. Prof. Nel was vroeër ’n landbouprofessor aan Tukkies en het sy navorsing in onkruidbeheer begin ná studies in Stellenbosch en die VSA. Hy was oorspronklik van Matjiesvlei, Calitzdorp, waar sy familie al lank boer.

Die naam “Charisma” kom van die Griekse woord vir ’n “gawe van genade, guns en inspirasie” – iets wat mooi pas by hierdie spesiale olie.

Carin is eintlik ’n tandarts, maar help elke jaar met die oes. Al bestuur sy nie die boord daagliks nie, is sy trots op wat hulle as span regkry – sy man, die plaas-werkers en die hele Karoo-gemeenskap dra daartoe by. Sy sê ook die sukses lê nie net in die olywe nie, maar in hoe die olie geprosesseer word: die masjiene, die tegniek, en hoe presies alles gebottel word, speel ’n groot rol in die eindproduk se gehalte.

Die Absa Top 10-toekenning is vir hulle meer as net ’n wen – dis ’n bewys van harde werk, toewyding en die liefde vir tradisie. Die span by Ouma Se Huis is baie dankbaar vir elke hand wat help om Charisma wêreldklas te maak.