Pannar Seed het onlangs die aanstelling van Lukas Meyer as nuwe besigheidsbestuurder aangekondig. Meyer neem die leisels oor by John Odendaal, wat aan die einde van April aftree ná ’n lang en invloedryke loopbaan by Pannar. Met meer as twee dekades se ervaring in die saad en gewasbeskermingsbedryf bring Meyer ’n kombinasie van tegniese kennis en kommersiële leierskap na sy nuwe rol, ’n mengsel wat toenemend noodsaaklik raak in ’n landbou-omgewing waar data, genetika en markrealiteite al hoe nouer verweef raak.