Wanneer die sneeuvlokkies in Ceres val, is al wat leef en beef in hul motors om die Matroosberg met sy sneeukombers te gaan geniet. Daar word sneeumanne met wortelneuse gebou, droë takke word inderhaas vir arms ingespan en serpe word om die sneeumanne se yskoue nekke gedraai. Groot sneeuballe tref dik baadjies met dowwe plofgeluide – sneeupret op sy beste, ’n uur of drie van die Kaap af.