Potatoes South Africa, die bedryfsorganisasie van die aartappelbedryf, het verklaar dat die aartappelvoorsiening vir 2024 stabiel bly en dat berigte oor aartappeltekorte en buitensporig hoë pryse oordrewe is en onwaarskynlik is om te realiseer.
Alhoewel die mark tans ‘n afname in voorraad ervaar, is die volumes nie drasties laer in vergelyking met dieselfde tydperk oor die afgelope paar jaar nie.
Daar is wyd berig oor ryp in Limpopo gedurende die wintermaande van 2024, wat beperkte groei van aartappels tot gevolg gehad het. ’n Opname deur Potatoes SA onder aartappelprodusente in Limpopo toon egter dat aartappels in verskillende groeistadiums was toe die ryp voorgekom het, wat beteken het dat nie alle aartappelaanplantings vernietig is nie. Alhoewel dit moeilik was om die verliese in opbrengs te kwantifiseer, dui data daarop dat 3 674 hektaar in Limpopo geraak is, met ‘n moontlike gemiddelde opbrengsverlies van 32%. Dit sal waarskynlik lei tot ‘n 3% vermindering in aartappelvoorsiening vanaf die 5-jaar gemiddeld landwyd.
Willie Jacobs, uitvoerende hoof van Potatoes SA, het gesê dat volgens hul data die verlies aan opbrengs groter sal wees in terme van knolgrootte. “Ons verwag minder ekstra-groot en groot aartappels en meer medium en klein aartappels vir die tydperk September en Oktober in Limpopo.”
Oor die algemeen is aartappelvoorrade vir 2024 hoër in vergelyking met verlede jaar. Jacobs het opgemerk dat die mark tot op hede 208 000 10kg-sakke meer ontvang het as wat teen hierdie tyd in 2023 ontvang is. Die gemiddelde prys vir die eerste 34 weke van 2024 was R2,22 laer as die prys vir dieselfde tydperk in 2023.
Produsente werk tans daaraan om die gaping in aartappelvoorsiening te sluit, met groeistreke regoor Suid-Afrika wat inspring om te verseker dat die voorrade stabiel bly. “Suid-Afrika het die voordeel dat aartappelproduksie oor ’n wye verskeidenheid streke en provinsies versprei is. Dit verminder die risiko vir weerverwante skokke in die mark aansienlik,” het Jacobs gesê.
Om op hoogte te bly van die nuutste markinligting, laai gerus Potatoes SA se toep af op Google Playstore en Apple Appstore.