Wêreld Hondsdolheidsdag, wat op 28 September 2024 plaasgevind het, het wêreldwyd mense en organisasies gemobiliseer om saam te werk teen een van die gevaarlikste soönose wat mense en diere raak. Met die tema “Breek Grense” het die dag ’n sterk boodskap gedra oor die belangrikheid van samewerking oor grense heen om hondsdolheid te bekamp.

Hondsdolheid, ’n dodelike virus wat enige soogdier kan besmet, is amper altyd fataal sodra simptome verskyn. Hierdie simptome sluit in gedragsveranderinge, oormatige speekselvloei, verlamming, en aggressie. Op Wêreld Hondsdolheidsdag is die kritieke rol van inenting weer beklemtoon as die doeltreffendste manier om hierdie siekte te voorkom.
 
Wetgewing in Suid-Afrika vereis dat alle honde en katte ingeënt moet word om beide mense en diere teen hondsdolheid te beskerm. Die eerste inenting moet op drie maande ouderdom gegee word, gevolg deur ’n herinenting binne een tot 12 maande, en daarna elke drie jaar. In hoërisiko-gebiede, soos die oostelike streke van Suid-Afrika, word jaarlikse inentings sterk aanbeveel.

Die virus is reeds teenwoordig in al nege provinsies van die land, met hondehondsdolheid veral in streke soos Limpopo, Mpumalanga, KwaZulu-Natal en die Oos-Kaap. Omdat troeteldiere, wilde diere en vee met hondsdolheid besmet kan word, het die dag ook gefokus op hoe belangrik dit is dat gemeenskappe saamwerk om ’n beskermende skild te vorm deur hul troeteldiere gereeld in te ent.
 
Wêreld Hondsdolheidsdag het nie net bewustheid geskep oor die gevare van hondsdolheid nie, maar ook die noodsaaklikheid van vinnige optrede as iemand deur ’n verdagte dier gebyt of gekrap word. Om die wond onmiddellik met seep en water te was en mediese hulp te soek, kan lewens red.
 
Hierdie dag het ’n belangrike boodskap gelaat: hondsdolheid is 100% voorkombaar, en saam kan ons die grense breek wat die verspreiding daarvan toelaat. Deur voort te gaan met bewustheidsveldtogte en gemeenskapsbetrokkenheid kan ons daartoe bydra om hierdie dodelike siekte in die toekoms hok te slaan.