Die afgelope 30 jaar het die ANC aanhou karring aan ’n beleidsomgewing wat bitter min goeds vir die land en sy mense beteken het. Suid-Afrika sit met reuseprobleme: misdaad wat buite beheer is, werkloosheid wat net aanhou styg, paaie en krane wat nie meer werk nie, swak onderwys en ’n ekonomie wat maar sukkel om aan die gang te kom. Boonop druk die regering aan met rasgebaseerde wetgewing wat die land net verder verdeel en vertroue in die ekonomie knou.

“Teen dié tyd behoort elke burger te besef die ANC se einddoel is om Suid-Afrika in ’n sosialistiese of selfs kommunistiese rigting te druk,” sê Bennie van Zyl, hoofbestuurder van TLU SA. “Elke besluit en wet wat hulle instel, moet teen daardie agtergrond gesien word.”

Sedert die ANC sy volstrekte meerderheid verloor het, het hul beleid net meer radikaal geword – klaarblyklik in ’n poging om verlore steun terug te wen. Die jongste voorbeeld hiervan is die Onteieningswet – ’n gevaarlike, kortsigtige wet wat beleggers afskrik en ons ekonomie
verder versmoor.

“Elke ekonomiese denker wat sy sout werd is, het lankal gewaarsku dat onteiening sonder vergoeding rampspoedig gaan wees vir beleggingsvertroue,” sê Van Zyl. “Wat is dit wat die ANC nie wil verstaan nie?”

“Elke ekonomiese denker wat sy sout werd is, het lankal gewaarsku dat onteiening sonder vergoeding rampspoedig gaan wees vir beleggingsvertroue.”

Hierdie wet hou ernstige gevare in vir alle inwoners van Suid-Afrika. TLU SA het van die begin af sterk daarteen standpunt ingeneem – eers toe die regering die Grondwet wou verander, en nou teen die wet self. Die organisasie sal nie stilbly nie, en sal aanhou wys dat die wet eerder ekonomiese skade aanrig as om vertroue te bou.

TLU SA bedank elke instansie en individu wat saamstaan in hierdie stryd. Die onteieningsklousule is eenvoudig nie grondwetlik nie, en ons glo die Konstitusionele Hof moet dit verwerp.

Verskeie organisasies is al besig om die wet in die hof te toets. Dis belangrik dat diegene wat litigeer hul regstrategieë goed belyn, sodat geen argument die ander se saak ondermyn of verswak nie.

TLU SA se regspan is reg om hof toe te gaan, maar glo samewerking met ander groepe is die sterkste manier om die wet teen te staan. “Ons is reeds in gesprek met ’n organisasie wat al sukses in die Konstitusionele Hof behaal het, en kyk hoe ons kan saamwerk om hierdie wet so doeltreffend as moontlik te beveg,” sê Van Zyl.