Agri-Expo en die Wes-Kaap is trots om die wêreld van landbou in Suid-Afrika te verwelkom vir die 31ste Statebond-Landboukonferensie, wat van 1 tot 5 November 2026 by die Century City Konferensiesentrum in Kaapstad aangebied word.
Registrasie het op 3 November 2025 geopen, met doutrapper-tariewe beskikbaar tot 30 April 2026. Afgevaardigdes uit Suid-Afrika en ander Afrika-lande kan uitsien na ’n spesiale streekafslag – ’n gebaar van erkenning aan die gasheer-kontinent.
’n Eerste vir kaapstad en hupstoot vir agritoerisme
Die tweejaarlikse konferensie, aangebied deur Agri-Expo in samewerking met die Royal Agricultural Society of the Commonwealth (RASC), bring landbouleiers, beleidmakers, navorsers en jong innoveerders van regoor die Statebond byeen.
“Dit is ’n eerste vir Kaapstad, en Agri-Expo is baie trots om as gasheer op te tree,” sê Breyton Milford, hoofbestuurder van Agri-Expo en trustee van die RASC. “Die Wes-Kaap bied ’n dinamiese omgewing waar landbou, innovasie en wêreldklas-toerisme op ’n unieke manier saamsmelt.
“Suid-Afrika is as die poort tot landbou in Afrika ideaal geposisioneer om internasionale afgevaardigdes bloot te stel aan die kontinent se enorme potensiaal en veelsydige landbou-ekonomie.”
Die Wes-Kaap is een van Suid-Afrika se mees produktiewe en mededingende provinsies. Die landboubedryf floreer hier, met ’n sterk voedsel- en drankvervaardigingssektor, ’n gevestigde uitvoerbasis en meer as 200 000 mense wat in landbou werksaam is. Die provinsie se vrugbare landbougebiede, internasionale hawe en nabyheid aan Afrika-markte maak dit ’n sleutelspeler in streekvoedselveiligheid en handel.
’n Wêreldbyeenkoms vir landbou-samewerking
Sir Nicholas Bacon, voorsitter van die RASC, sê: “Ek is verheug dat die 2026 RASC-konferensie deur Agri-Expo in Kaapstad, Suid-Afrika, aangebied gaan word, en ek sien geweldig daarna uit. Onder die tema ‘Opportunities of Change in a Connected World: From South Africa to the World’ beloof dit om ’n uitsonderlike week van gesprek, samewerking en netwerkgeleenthede te wees. Die pre-konferensie-toere sal bydra tot diepte en kwaliteit, en afgevaardigdes kan uitsien na ’n inspirerende program.
“Die uitdagings waarmee landbou wêreldwyd te kampe het, is dikwels soortgelyk – hierdie konferensie bied ’n waardevolle platform om ervarings te deel, oplossings te vind en blywende verhoudings te bou.”
Wêreldklas-venue en program
Die bekroonde Century City Konferensiesentrum – onlangs as Afrika se mees volhoubare venue aangewys – sal die hoofkonferensie huisves.
Afgevaardigdes word aangemoedig om vroeg te bespreek vir die pre-konferensie-toer wat van 29 tot 31 Oktober 2026 in Stellenbosch plaasvind. Hierdie unieke, persoonlike landbou-ervaring bied beperkte plekke en beloof ’n onvergeetlike voorsmakie van die streek se ryk landbou-erfenis.
Programhoogtepunte sluit in die HUB-konferensie en die Next Generation (NG)-konferensie by FNB Portside, gevolg deur gesamentlike sessies en netwerkgeleenthede in Century City.
Vorige RASC Statebond-Landboukonferensies is reeds in Edinburgh (VK), Brisbane (Australië), Edmonton (Kanada), Livingstone (Zambië) en Singapoer aangebied.
Vennote vir die 2026 RASC Statebond-Landboukonferensie sluit onder meer in die Wes-Kaapse Departement van Landbou, Hollard, FNB, De Grendel-wynlandgoed, die Suid-Afrikaanse Nasionale Konvensieburo en Wesgro.
Vir registrasie en meer inligting, besoek www.rasc2026.com of www.agriexpo.co.za.