Vir Vincent Pike is ’n goeie veiling nie net ’n vinnige tong en ’n sterk stem nie. In die lewendehawebedryf verg dit markkennis, diere-oordeel en die vermoë om binne sekondes die regte besluit te neem.

Wanneer ’n lewendehaweveiling aan die gang is, lyk dit vir die oningewyde dalk soos ’n vinnige spel van nommers, handgebare en ritme. Maar vir Vincent Pike, vanjaar se SA Nasionale Veilingskampioen, is daar baie meer op die spel as net die volgende bod.

As lewendehaweveilingsmeester by Vleissentraal Bethlehem werk hy daagliks in ’n omgewing waar pryse, dieregehalte, markvraag en menseverhoudings almal tegelyk gelees moet word. Dit is juis dié kombinasie van tegniese kennis en mense-instink wat hom vanjaar weer die hoogste eer in die South African Institute of Auctioneers (SAIA) se SA Nasionale Veilingskampioenskap besorg het.

Die ring vra kennis en ritme

Pike, wat reeds in 2024 as SAIA se Veilingsmeester van die Jaar aangewys is, het vanjaar weer teen topveilingsmeesters van regoor die land meegeding. Die kampioenskap is onlangs by die Wanderers Club in Johannesburg aangebied, waar deelnemers verskeie lotte ten bate van liefdadigheid moes veil. Hulle is beoordeel op voorbereiding, betrokkenheid by die gehoor, beheer van bieërs en bod, roepstyl, tempo en die algehele sukses van die veiling.

“Vir my is dit ’n bevestiging dat ek hierdie groot eer verdien tussen die hoogste vlak van deelnemers in die land. Dit beteken regtig baie vir my.”

Vir Pike was vanjaar se uitdaging anders as sy gewone werk in die lewendehawering. Pleks van diere moes hy wyn en ’n jaguitstappie opveil — in ’n formele kompetisie-omgewing, voor ’n gehoor van eweknieë, hoogwaardigheidsbekleërs en ’n deskundige beoordelaarspaneel.

“Hierdie tweede oorwinning het minder senutergend gevoel as die eerste een, maar dit is vir my nie minder betekenisvol nie,” sê hy. “Vir my is dit ’n bevestiging dat ek hierdie groot eer verdien tussen die hoogste vlak van deelnemers in die land. Dit beteken regtig baie vir my.”

Voorbereiding voor die hamer val

Volgens Pike begin ’n goeie veiling lank voor die hamer val. Voorbereiding is vir hom die kern van veilingsmeesterskap. Dit beteken dat hy die lotte deeglik moet ken, die pryskonteks moet verstaan en vooraf moet beplan hoe die veiling waarskynlik gaan verloop.

“Voorbereiding is alles in hierdie spel. Om die items te ken en jou huiswerk te doen, is ’n kernaspek van veilingsmeesterskap. Wanneer dit dan jou tyd is om die veiling te lei, gaan dit oor tempo, asemhaling, ritme en duidelikheid.”

In sy daaglikse werk is dié voorbereiding selfs meer tegnies. Lewendehaweveilings vereis dat ’n veilingsmeester in reële tyd slagwaardes, voerkrale-pryse, markbewegings en die toestand van diere moet verreken. Elke dier, elke koper en elke bod moet vinnig gelees word.

“Voorbereiding is alles in hierdie spel. Om die items te ken en jou huiswerk te doen, is ’n kernaspek van veilingsmeesterskap. Wanneer dit dan jou tyd is om die veiling te lei, gaan dit oor tempo, asemhaling, ritme en duidelikheid.”

Pike sê die bestuur van bodverhogings is een van die belangrikste vaardighede in die ring. Wanneer die vraag sterk is, moet die veilingsmeester weet wanneer om die tempo te hou, wanneer om die verhogings aan te pas en hoe om bieërs betrokke te hou sonder om die verkoop te forseer.

“Sodra ek gesien het die vraag neem toe, het ek die verhogings aangepas en ’n goeie prys behaal,” sê hy.

Vir hom gaan veilingsmeesterskap egter nie net oor die koper nie. Dit gaan ook oor die verkoper. Verwagtingsbestuur, eerlikheid en deursigtigheid bepaal of langtermynverhoudings in die bedryf behoue bly. In ’n mark waar produsente, kopers en agente dikwels oor jare saamwerk, is vertroue net so belangrik soos tempo.

Pike beskryf lewendehaweveilings as een van die mees tegnies veeleisende segmente van die veilingsbedryf. Dit verg nie net ’n sterk verhoogpersoonlikheid nie, maar ook diepgaande dierekennis, markbegrip en die vermoë om onmiddellike besluite te neem sonder om die verkoop te vertraag.

Van Bethlehem na San Antonio

Sy jongste oorwinning bou voort op ’n groeiende lys prestasies, waaronder die Toyota SA National Young Auctioneer Competition-titel in 2023 en SAIA Veilingsmeester van die Jaar in 2024.

Nou skuif sy fokus na die internasionale verhoog. In Julie beplan Pike om die South African Institute of Auctioneers as die 2026 SA Nasionale Veilingskampioen by die National Auctioneers Association Competition in San Antonio te verteenwoordig.

Vir hom is dit nie net ’n persoonlike mylpaal nie, maar ook ’n kans om Suid-Afrikaanse veilingsmeesterskap op ’n groter verhoog te wys. Want agter elke vinnige bod en elke vallende hamer lê daar ’n fyn balans tussen kennis, ritme, vertroue en tydsberekening.