Suiwelvervaardigers kan nou inskryf vir die 2024 Suid-Afrikaanse Suiwelkampioenskappe

Inskrywings is nou oop vir die grootste, oudste en mees gesogte suiwelgebeurtenis in die land, die 2024 Suid-Afrikaanse Suiwelkampioenskappe, wat vanjaar vir die 191ste keer plaasvind.

Glanssjef Pete Goffe-Wood tree gereeld as beoordelaar op by die SA Suiwelkampioenskappe. Foto: Natalie Gabriels Photography.

Die kampioenskappe, wat sedert 1834 deur Agri-Expo aangebied word, lok jaarliks sowat 900 inskrywings van groot, medium en klein suiwelvervaardigers. Hierdie produkte ding mee om die gesogte titels van SA Kampioen, die Qualité-merk van Uitnemendheid en die uiteindelike Produk van die Jaar, wat aangewys word tydens die prestigeryke SA Suiweltoekennings.

Alle Suid-Afrikaanse suiwelvervaardigers word genooi om tussen 15 Januarie en 5 Februarie vir die 2024 SA Suiwelkampioenskappe in te skryf. Foto: Natalie Gabriels Photography.

Die SA Suiwelkampioenskappe bestaan uit meer as 100 klasse vir kaas, jogurt, melk, room, roomys, botter en ander suiwelprodukte. Elke klas het ‘n wenproduk wat met die titel van SA Kampioen bekroon word. Die Qualité-merk van Uitnemendheid, wat deur die SA suiwelbedryf as sy enigste merk van uitnemendheid erken word, word slegs toegeken aan uitgesoekte produkte van uitsonderlike gehalte wat ‘n spesifieke minimum punt op die internasionale telkaart behaal het. Die produk wat die hoogste punt behaal, word as Produk van die Jaar gekroon.

Breyton Milford (Hoofbestuurder van Agri-Expo), Gaëlle Lettier Buchhorn (internasionale beoordelaar en suiwelspesialis by Chr.Hansen), dr. Ivan Meyer (Wes-Kaapse minister van landbou), en Robyn Bolters (produkontwikkelaar en eerstekeer-beoordelaar) tydens die beoordeling van die 2023 SA Suiwelkampioenskappe, aangebied deur Agri-Expo by Eensgezind, Durbanville. Foto: A Gorman Photography.

Volgens Breyton Milford, Hoofbestuurder van Agri-Expo, is die doel van die SA Suiwelkampioenskappe om uitnemendheid in die suiwelbedryf te erken en te bevorder. “Hierdie kampioenskappe het die maatstaf geword vir vervaardigers om hulself teen mekaar te meet,” sê Milford. “Ons is bevoorreg om die suiwelbedryf deur middel van hierdie platform te dien, wat moontlik gemaak geword in samewerking met die platinumvennote IMCD en DSM, asook ander vennote.”

Alan Fourie is die Hoofbeoordelaar van die SA Suiwelkampioenskappe wat jaarliks deur Agri-Expo by Eensgezind, Durbanville aangebied word. Foto: Natalie Gabriels Fotografie.

BELANGRIKE DATUMS
• Inskrywings open op Maandag 15 Januarie 2024 op die webwerf https://cheesesa.co.za/.
• Die sluitingsdatum vir inskrywings is Maandag 5 Februarie 2024.
• Die beoordeling vind op Donderdag 7 en Vrydag 8 Maart 2024 by Eensgezind buite Durbanville plaas.
• Die SA Suiweltoekennings word op Donderdag 25 April 2024, ook by Eensgezind, aangebied.