Die NWK-groep het vandag hul finansiële resultate vir die 2025-boekjaar bekend gemaak, en dis duidelik dat die droogte van die afgelope seisoen ’n groot merker op die maatskappy se prestasie gelaat het. Met ’n skerp daling van 50% in wins ná belasting, sou ’n mens dink die nuus is sleg. Maar NWK is optimisties oor die pad vorentoe.

Die droogte eis sy tol

Die 2023/2024-seisoen was een van die droogstes in NWK se bedieningsgebied in meer as vyf dekades. Die gevolge was duidelik sigbaar: graanontvangstes het met ’n skokkende 43,4% gedaal, wat direk gelei het tot ’n afname van R349 miljoen in inkomste vir die Graan-segment. Die silo’s, wat gewoonlik as veiligheidsnet dien, het amper leeg geloop omdat min voorraad oorgedra kon word. Selfs NWK se Logistieke-afdeling, wat graan vervoer met ’n vloot van 35 vragmotors, het gesukkel weens die laer volumes.

“Weens NWK se doelgerigte, konserwatiewe en deursigtige balansstaat en finansiële bestuur, asook strategiese vennootskappe in landbou, is die maatskappy in ʼn gesonde finansiële posisie en gereed om produsente by te staan om die beste uit hulle produksie in die komende jaar te realiseer.”

Aan die Handelsegment se kant het die droogte produsente genoop om hul uitgawes drasties te verminder. Boere het minder aan kunsmis, veevoer en selfs sonkragstelsels bestee – laasgenoemde weens verbeterde beurtkrag deur Eskom (’n ironiese wending). NWK Meganisasie het ook ’n knou gekry, met ’n daling van 38,7% in netto verkope, veral omdat tweedehandse masjinerie teen laer pryse verkoop moes word.

NWK se sonneblomoliepers

Terwyl baie afdelings gesukkel het, het Epko, NWK se sonneblomoliepers, geskitter met ’n rekordwins van R87 miljoen. Dit was ’n verrassende draai vir ’n afdeling wat jare lank deur kragonderbrekings gepla is. Die aanleg het nuwe infrastruktuur ingesluit om stilstaantyd te vermy, en die hoë proteïen- en oliepersentasies in die sonneblomontvangstes het gehelp om die teiken te oortref. NWK het ook ’n nuwe olieverfyningaanleg in die pyplyn, wat in die 2025/2026-boekjaar operasioneel sal wees – ’n stap wat hul risiko verder sal verminder.

Nuwe seisoen

Hoewel die finansiële syfer ’n harde slag reflekteer, bly NWK finansieel gesond met ’n ekwiteit van R2 104 miljoen en ’n dividend van 48 sent per aandeel. Die maatskappy is optimisties oor die nuwe seisoen, wat beloof om meer vrugbaar te wees dankie gunstige reënval en verbeterde grondvog.

Alf White, NWK se groephoof-finansiële beampte, het beklemtoon dat die maatskappy se balansstaat sterk bly. “Weens NWK se doelgerigte, konserwatiewe en deursigtige balansstaat en finansiële bestuur, asook strategiese vennootskappe in landbou, is die maatskappy in ʼn gesonde finansiële posisie en gereed om produsente by te staan om die beste uit hulle produksie in die komende jaar te realiseer. Ons wens hulle alle sterkte en sukses toe.”

NWK se storie is een van veerkragtigheid. Ja, die droogte het hulle hard getref, maar met slim aanpassings, ’n wenstrategie by Epko en die belofte van ’n beter landboujaar, lyk die toekoms belowend. Soos die Afrikaanse spreekwoord sê: Na donkerte kom die lig. En vir NWK, is daardie lig duidelik in sig.