NAMPO Kaap 2025, wat van 10-13 September by Bredasdorp Park aangebied word, bied vanjaar ’n dinamiese program waar werkende honde die kollig steel. Van die intelligensie van skaaphonde en die krag van Boerboele tot die presisie van die SA Lugmag se honde-eenheid – besoekers kan uitsien na ’n reeks demonstrasies wat die unieke rol van honde in landbou en veiligheid beklemtoon.
SA Lugmag se Honde-eenheid
Die SA Lugmag se hoogs opgeleide honde wys hul vaardighede in die arena op Woensdag (13:00-14:00), asook op Donderdag- en Vrydagoggende (08:00-09:00). Hierdie diere demonstreer taktiese reaksies en gedragsopleiding wat in werklike operasies gebruik word, en gee besoekers ’n kykie in militêre hondehantering van wêreldgehalte.
“Hierdie diere demonstreer taktiese reaksies en gedragsopleiding wat in werklike operasies gebruik word…”
Skaaphondprogram
Ten spyte van tegnologiese vooruitgang, bly werkende honde ’n onmisbare hulp vir boere. ’n Goed afgerigte skaaphond kan ’n skaapboer of sy span help om ’n trop skape of beeste vinnig en sonder spanning te bestuur. Aangebied deur die Suid-Afrikaanse Skaaphondvereniging (SASDA), bied hierdie program opvoedkundige insig in kuddebestuur met interaktiewe vertonings. Besoekers kan ook die gewilde kraaldemonstrasies sien, waar hanteerders hul honde deur ’n voorgeskrewe baan lei om presisie en samewerking te demonstreer.
Boerboel-skou
Op Saterdag (09:00-14:00) kan Boerboel-liefhebbers hierdie trotse Suid-Afrikaanse ras in die arena bewonder tydens ’n gespesialiseerde skou. Bekend vir hul lojaliteit, krag en selfvertroue, is Boerboele ’n simbool van funksionele elegansie en ’n gunsteling onder honde-eienaars. Beoordeling fokus op algemene voorkoms, bouvorm, beweging, skou-aanwesigheid en hoe goed die hond aan die rasstandaard voldoen. Ongeveer 100 geregistreerde Boerboele word verwag om vir die titel mee te ding.
“’n Boerboel-skou is meer as net ’n kompetisie – dit is ’n viering van hierdie unieke Suid-Afrikaanse ras.”
’n Boerboel-skou is meer as net ’n kompetisie – dit is ’n viering van hierdie unieke Suid-Afrikaanse ras. Besoek tydens die ekspo gerus die SABBS (SA Boerboel Telersgenootskap) se stalletjie in die Landbank Veetent en beleef self die trots van Boerboel-teling.
Met hierdie hondevertonings bring NAMPO Kaap 2025 tradisie en tegnologie bymekaar, en huldig dit daagliks die uitsonderlike vaardighede, lojaliteit en toewyding van werkende honde. Moenie dit misloop nie!
Meer inligting is beskikbaar by www.nampokaap.co.za, en kaartjies kan aanlyn gekoop word by www.ticketpros.co.za teen R100 per volwassene (of R110 by die hek), R50 per kind en gratis vir voorskoolse kinders. Die ekspo vind plaas van 10–12 September (08:00–17:00) en op 13 September (08:00–14:00).