• Meer as R200 miljoen is in die modernisering van die historiese Paarl-fabriek belê.
• Mrs Ball’s Chutney word nou vir die eerste keer deur Tiger Brands self in Paarl vervaardig.
• ’n Nuwe asynaanleg kan tot drie miljoen liter per jaar produseer.
• Konfyt word voortaan in ligter, herwinbare PET-houers verpak.
• Die uitbreiding ondersteun plaaslike voedselverwerking en Wes-Kaapse produsente.

Tiger Brands het sy fabriek in Paarl, wat reeds in 1903 gevestig is, in ’n moderne kulinêre megaterrein omskep. Die belegging bring die vervaardiging van Mrs Ball’s Chutney terug na die Wes-Kaap, verminder die onderneming se afhanklikheid van eksterne vervaardigers en verskaffers, en skep ’n groter mark vir plaaslik verboude vrugte en groente.

’n Fabriek wat al meer as 120 jaar deel van Paarl se landbou- en voedselverwerkingsgeskiedenis is, het ’n nuwe hoofstuk betree. Tiger Brands het meer as R200 miljoen in sy historiese Paarl-aanleg belê en die perseel in ’n moderne kulinêre megaterrein met drie afsonderlike produksieaanlegte omskep.

Die ontwikkeling sluit ’n nuwe asynaanleg, drie produksielyne vir Mrs Ball’s Chutney en nuwe verpakkingslyne vir konfyt in herwinbare PET-houers in. Volgens Tiger Brands is dit die eerste groot strukturele belegging wat in werking tree as deel van die onderneming se strategie om sy vervaardigingsnetwerk te moderniseer, produksiekoste te verlaag en sy voorsieningskettings meer bestand teen ontwrigting te maak.

’n Fabriek met diep wortels

Die Paarl-fabriek is oorspronklik in 1903 gevestig en het sedertdien deurlopend ’n rol in die plaaslike voedselverwerkingsbedryf gespeel.

All Gold Tomato Sauce is in Paarl ontwikkel en is reeds in 1908 kommersieel bekendgestel. Die oorspronklike resep is deur ’n chemikus saamgestel wat moeseliensakkies met kruie en speserye in potte fyngedrukte tamaties laat sak het. Die sous het vinnig gewild geword en was vir baie jare die vlagskipproduk van die Paarl-aanleg.

H. Jones & Co. se konfyt- en inmaakfabriek is in 1910 in Paarl gevestig. Die Australiese onderneming het gedurende ’n moeilike tydperk vir die plaaslike wynbedryf na Suid-Afrika uitgebrei, onder meer om surplusvrugte uit die streek te benut. Die fabriek het later bekend geword vir produkte soos All Gold Tomato Sauce en Silver Leaf-konfyt. Ná verskeie herstrukturerings in die Wes-Kaapse voedsel- en inmaakbedryf het die aanleg en sy handelsmerke uiteindelik deel van Tiger Brands geword. Vandag word onder meer All Gold Jam, Hugo’s Jam, Mrs Ball’s Chutney, Colman’s Worcestershire Sauce en mosterd, asook Crosse & Blackwell Kasi Sauces op die terrein vervaardig.

Mrs Ball’s kom huis toe

Een van die belangrikste dele van die belegging is die verskuiwing van Mrs Ball’s Chutney se produksie na Paarl. Die produk is voorheen namens Tiger Brands deur ’n derdepartyvervaardiger in Gauteng gemaak. Dit is die eerste keer dat die vervaardiging van die handelsmerk volledig onder Tiger Brands se eie beheer plaasvind.

Drie produksielyne is geïnstalleer. Dit sluit ’n lyn vir die bekende 470 g-glashouer in, asook lyne vir PET-verpakkings van 375 g, 800 g en 1,1 kg. Grootmaatverpakkings van 3 kg en 6,25 kg vir die spysenieringsmark word ook hier vervaardig. Die produksieaanleg kan tussen 140 en 145 ton blatjang per dag lewer wanneer dit teen volle kapasiteit werk.

Dumo Mfini, besturende direkteur van Tiger Brands se kulinêre afdeling, sê die verskuiwing maak kommersieel sin omdat die fabriek nader aan verskeie van die produsente geleë is wat die nodige grondstowwe lewer. Volgens Mfini behoort die verskuiwing van produksie na Paarl te help om koste te beperk, gehaltebeheer te verbeter en die onderneming se afhanklikheid van eksterne vervaardigers te verminder.

“Ons doel is om ons fabrieke te omskep sodat hulle wêreldklas en doeltreffender kan word. Só kan ons ons belofte aan verbruikers nakom en seker maak dat ons ikoniese handelsmerke toeganklik bly,” het Mfini tydens die bekendstelling gesê.

“Dit help nie dat ons al die toekennings vir die beste handelsmerke wen, maar die produkte is uiteindelik te duur vir verbruikers nie. Ons moet seker maak dat hulle steeds bekostigbaar bly.”

Eie asyn verminder produksierisiko

Die tweede groot ontwikkeling is ’n toegewyde asynaanleg met ’n produksievermoë van drie miljoen liter per jaar, of ongeveer 8 000 liter per dag. Asyn is ’n belangrike bestanddeel in produkte soos Mrs Ball’s Chutney, All Gold Tomato Sauce, Crosse & Blackwell Mayonnaise en Worcestershire-sous. Tiger Brands was voorheen grootliks van eksterne asynverskaffers afhanklik. Dié afhanklikheid het ’n paar jaar gelede tot ernstige produksieprobleme gelei toe ’n verskaffer kragonderbrekings ervaar het en vir sowat ses weke nie asyn kon fermenteer nie.

“Dit het ons onderneming hard getref,” het Mfini gesê.

Die nuwe aanleg sal Tiger Brands in staat stel om ’n beduidende deel van sy eie asynbehoefte te voorsien. Die onderneming sal steeds van eksterne verskaffers aankoop, maar behoort nou meer as die helfte van sy kulinêre afdeling se asynbehoefte self te kan vervaardig. Dit verkort die voorsieningsketting en verminder die gevaar dat produksie weens probleme by ’n enkele verskaffer tot stilstand kom.
Tjaart Kruger, uitvoerende hoof van Tiger Brands, het die nuwe produksielyne as wêreldklas beskryf.

“Hierdie aanlegte lyk regtig goed. Dit is werk van wêreldgehalte,” het Kruger gesê. “Om ’n fabriek soos hierdie te bou, gebeur nie vanself nie. Dit verg baie harde werk.”

Konfyt skuif van blikke na plastiek

Die derde deel van die belegging is die verandering van konfytverpakking van tradisionele blikke na herwinbare plastiekhouers. Tiger Brands sê die onderneming is die eerste groot vervaardiger in Suid-Afrika wat dié verandering in die konfytkategorie maak.

Nuwe verpakkingslyne is geïnstalleer vir houers van 290 g, 480 g en 900 g. Die lyne kan ook aangepas word om toekomstige verpakkingsgroottes te vervaardig. PET, ’n soort plastiek, is ligter as glas en tradisionele blikke, makliker om te vervoer en geriefliker vir verbruikers om te gebruik. Die houer kan weer toegemaak en direk in die yskas gebêre word.

Mfini sê die nuwe verpakking spreek ’n praktiese probleem in baie huishoudings aan, waar konfyt uit ’n blik in ’n ander houer oorgegooi moet word nadat dit oopgemaak is.

“Nou kan die verbruiker die houer eenvoudig oopmaak, die konfyt gebruik en dit weer in die yskas sit, sonder dat ’n tweede houer nodig is,” het hy gesê.

Die ligter verpakking behoort ook vervoerkoste te verminder, terwyl die produk se smaak en gehalte behoue bly.

Plaaslike boere deel in die waardeketting

Die Paarl-fabriek is nouer verbind met ’n landbouvoorsieningsketting wat oor verskeie produksiegebiede in die Wes-Kaap strek. Aarbeie uit Paarl en Stellenbosch word vir die aarbeikonfyt van All Gold en Hugo’s gebruik. Uie uit Villiersdorp en Grabouw word vir Mrs Ball’s Sweet Chilli Sauce aangekoop, terwyl Sevilla-lemoene uit Ceres vir KOO se Sevilla-konfyt gebruik word. Dié konfyt word hoofsaaklik vir uitvoermarkte vervaardig. Tiger Brands koop hierdie grondstowwe by sewe Wes-Kaapse produsente aan. Saam verskaf die betrokke boerderye permanente werk aan meer as 300 mense en seisoenale werk aan ongeveer 700 mense gedurende die piek van die oesseisoen.

Die verskuiwing van produksie van Gauteng na Paarl plaas die vervaardiging dus nader aan die gebiede waar die grondstowwe verbou word. Dit kan vervoerkoste verminder en die skakel tussen produsente en die verwerkingsaanleg versterk.

Premier Alan Winde het Tiger Brands se posisie tussen die landbouer en die verbruiker uitgelig.

“Hierdie onderneming is soos die gom tussen landbouproduksie aan die een kant en families se etenstafels aan die ander kant,” het Winde gesê.

“Dit beteken julle moet aanhou innoveer, aanhou belê en aanhou mededingend wees. Belegging skep werk, nie net direk in hierdie fabriek nie, maar ook by die ondernemings wat die tenks, vervoerbande, bottels, etikette en ander toerusting vervaardig.”

Winde het gesê plaaslike voedselverwerking is een van die belangrikste maniere om verdere waarde tot die Wes-Kaap se landbouprodukte toe te voeg.

“Wanneer jy ’n landbouproduk neem en waarde daaraan toevoeg, skep jy meer werkgeleenthede regdeur die waardeketting.”

Werksgeleenthede en vaardighede bly in Paarl

Die Paarl-fabriek bedryf verskeie produksieafdelings 24 uur per dag. Ongeveer 64 mense werk oor die verskillende skofte heen in die blatjangafdeling. Die konfytproduksie kan, wanneer al die lyne in gebruik is, werk aan sowat 92 mense verskaf. Die kleiner afdeling waar Colman’s en Crosse & Blackwell-produkte vervaardig word, het ongeveer 28 werknemers wat in skofte oor ’n tydperk van 24 uur werk.

Fabrieksbestuurder Roger Speelhart het gesê die belegging het aan werknemers groter sekerheid oor die fabriek se toekoms gegee. Werknemers was in die verlede bekommerd dat die fabriek moontlik kon sluit of dat produksie na ’n ander gebied verskuif kon word. Die nuwe toerusting en produksielyne het volgens hom ’n sterk boodskap oor werksekerheid gestuur.

Deel van ’n groter beleggingsprogram

Die Paarl-projek vorm deel van Tiger Brands se groter plan om ongeveer R1,5 miljard per jaar oor die volgende drie jaar aan kapitaalprojekte te bestee. In die piekjaar kan dié belegging tot R2 miljard styg. ’n Nuwe Tiger Brands-superbakkery van R1 miljard word tans in Pretoria ontwikkel en behoort in 2027 in gebruik geneem te word. ’n Nuwe megaverspreidingsentrum in Gauteng word vir die daaropvolgende jaar beplan.

Produksie by die Snacks and Treats-afdeling in eThekwini word intussen op ’n enkele megaterrein saamgevoeg, terwyl die onderneming ook die eerste groot opgradering in 33 jaar by sy Pietermaritzburg-meule voltooi het.

In Boksburg is die Culinary Hub gevestig om kommersiële spanne en die spanne vir navorsing, ontwikkeling en produksie nader aan mekaar te bring. ’n Kleiner proefaanleg sal die onderneming in staat stel om nuwe produkte en resepte op ’n kleiner skaal te toets voordat die volle produksielyne daarvoor gebruik word.

Voedingsprogramme en gemeenskapswerk

Tiger Brands se teenwoordigheid in die Wes-Kaap strek oor ses vervaardigingspersele.
Albany-produkte en meel word in Bellville vervaardig, tamatiepasta in Lutzville, asyn, konfyt en blatjang in Paarl, Jungle-produkte in Maitland en verskeie produkte in flesse en sakkies, asook ontbytgraan, in Ndabeni.

Die onderneming ondersteun ook verskeie voedingsprogramme en gemeenskapsprojekte in die provinsie. Nege Wes-Kaapse skole neem deel aan die Tiger Brands Foundation se voedingsprogram, wat ontbyt en middagete aan leerders verskaf. Die EduPlant-program help skole om groentetuine en vrugteboorde te vestig. Oor ’n tydperk van meer as 30 jaar het die program minstens 13 000 skole landwyd ondersteun.

Die Plates4Days-program verskaf maandeliks voedselpakkies aan kwesbare studente, onder meer by die Universiteit van Wes-Kaapland. Landwyd ondersteun die program meer as 5 000 studente per maand by sewe universiteite. Tiger Brands werk ook saam met organisasies soos die Yabonga Children’s Project en Stellenbosch se Love to Give, en het voedingspakkies aan gemeenskappe verskaf wat deur onlangse oorstromings in die Suid-Kaap en Wes-Kaap geraak is.
Vir Paarl beteken die nuwe megaterrein dat ’n fabriek met meer as ’n eeu se geskiedenis nie bloot bewaar word nie, maar weer as ’n belangrike deel van die plaaslike landbou- en voedselverwerkingsbedryf geposisioneer word.

“Paarl is al meer as 120 jaar in die hart van Suid-Afrikaanse voedselvervaardiging,” sê Kruger.

“Daardie nalatenskap word met hierdie belegging voortgesit. Ons is trots daarop om ons teenwoordigheid hier uit te brei en die plaaslike ekonomie te ondersteun.”