Diemersdal se nuutste erkenning as Wynkelder van die Jaar in die Platter’s South African Wine Guide 2026 is ’n besondere mylpaal vir ’n landgoed wat al meer as 300 jaar lank op dieselfde stuk grond boer en wyn maak. Die plaas, wat in 1698 as ’n landtoekenning deur Simon van der Stel ontstaan het, dra vandag nog die stil getuienis van eeue se geskiedenis: die statige Kaaps-Hollandse herehuis, die ou kloktoring en die historiese lanings wat reeds sedert die 18de eeu bewerk word.