Suid-Afrika se BKS-entstofstelsel word al hoe meer vir private deelname oopgestel. Boere kan reeds onder bepaalde voorwaardes entstof deur ’n veearts bekom en self hul beeste inent, terwyl private vervaardigers nou ook die LNR se plaaslike entstof onder lisensie kan produseer.
Bek en klouseer bly ’n ernstige bedreiging vir Suid-Afrika se veebedryf, en volgens SAPPO het verskeie varkeenhede die afgelope maande swaar getref. Hoewel die siekte reeds wydverspreid onder beeste voorkom, is dit nou ook in verskeie varkkuddes bevestig, selfs by produsente met goeie biosekuriteit. Dit dui daarop dat indirekte of omgewingsbesmetting moontlik ’n rol speel, eerder as duidelike biosekuriteitsfoute.
Die Departement van Landbou het onlangs aangekondig dat ’n plan glo gereed is om tot 14 miljoen beeste teen BKS in te ent. Dit klink bemoedigend, maar volgens drie van Suid Afrika se voorste landboukenners; Dr Theo de Jager, Nick Serfontein en Dr Danie Odendaal, is die prentjie heel anders. Hulle het in In Gesprek op kykNET gesels en ’n ontstellende blik op die werklikheid gegee.
