Farm Kitchen
Leave a comment

Rooibok-Filet-Flambé

Woorde: Jacques van Zyl Fotografie: Michel Dei-Cont

Dis eers wanneer ek my gordyne ooptrek by die Red Sands Country Lodge voor my stoepdeur en twee takbokke onder die blinkblaar-wag-ʼn-bietjie sien wei, dat ek besef waarom daar mak damherte rondloop by die plaas. Soos die enorme Schweinehaxe van die vorige aand, die Schnitzels en die Poolse Wodka-likeur wat Richard na ons tafel toe gebring het, is dit van die min herinneringe aan ʼn byna-vergete Oostenryk wat die Kaufmanns nog het.

“Julle kan sommer so resep neerskryf soos ek kook,” sê Richard, wat vertel dat sy ma voor haar aftrede die plaas se administrasie behartig het, en dat die Kaufmann-mans eerder die kokke is. 

Hy giet bietjie olie in ʼn vuurwarm pan op ʼn gasvlam en skroei twee bloedrooi, skoongesnyde rooibok-filette vinnig in die olie tot bruin aan die buitekant. 

Dan, af van die vuur, sprinkel hy sout, ʼn bietjie vleisspeserye en ʼn hele klompie varsgemaalde swart peper oor die vleis. 

Terug op die vuur, word ʼn goeie dop vyf jaar oue KWV-brandewyn in die pan gegiet. Almal deins terug as die wind skielik opkom en die gasvlam die brandewyn laat opvlam in ʼn vuurbal amper so groot soos die trollie.

“Wow! You singed my eyebrows there,” lag Michel, die fotograaf.

As die vlam gaan lê, word ʼn goeie driekwartkoppie vars room ingegiet en saam met die gekaramelliseerde vleissap en die vleis in die pan reduseer tot die vleis die regte graad van gaarheid bereik – in ons geval halfrou.

Richard sny die vleis in skyfies en rangskik hulle in ʼn bord bo-op die roomsous-reduksie uit die pan. Die vleis is nog rooi in die middel en lyk besonder treffend langs die gesprinkelde paprika op die bord se rand. 

Dis vars, sag en heerlik; die geur van impala word perfek gekomplementeer deur die vrugte-in-houtsmaak van die brandewyn en die aromatiese peperkorrels in die ryk sous.

Guten Appetit!


Resep: Red Sands Country Lodge www.redsands.co.za

Filed under: Farm Kitchen

by

A writer with a passion for the arts – including the art of cooking. Jacques concentrates on the stories that surround the people who are involved in making food, craft beer and wine. He received an award at the 2015 Franschhoek Literary Festival and the South African Wine Writers’ Awards. Another feather in his cap is that he is the author of Craft Beer: A Guide to South African Craft Breweries and Brewers. He is a writer of superior calibre and extensive creativity.

Leave a Reply

Your email address will not be published. Required fields are marked *