Aan die einde van elke jaar word daar op Gatlek, Dawid Fourie se plaas, feesgevier. Dawid beloon sy werkers vir hul werk, en hulle betoon hul dankbaarheid op ’n manier waaroor daar nie uitgewei word nie. Dit was tydens die nag van die laaste groot vleisbraai dat dinge vir Dawid en Gatlek begin skeefloop het.
Die voormalige SAID-prokureur, Telita Snyckers, gee ons in hierdie aangrypende publikasie ʼn blik op die donker kant van die tabakbedryf. As jy gedink het die smokkel van dwelms en wapens is winsgewend, moet jy weer dink.
Hier maak ons kennis met die makabere wêreld van Seb die lykbesorger wat sy werk met lyke gelate aanvaar – om hulle te versorg, bloed en ander liggaamsvloeistof uit te tap, verminktes te herbou, te was en vas te werk, en dan die bleek gesigte te grimeer en mooi te maak vir die familie.
Hierdie werk het sy oorsprong in ʼn reeks debatte oor die oorspronklike bruin mense van Suid-Afrika. Daar word spesifiek gekyk na die debat in die sewentiende eeu tussen twee Hollanders, Jan [Johan Anthoniszoon] van Riebeeck en Mathew [Matthijs] Proot oor die mensheid van die inheemse Khoisanbewoners in die omgewing van die hedendaagse Kaapstad.
In hierdie werk vertel die bekroonde joernalis, Hanlie Retief die lewensverhaal van die legendariese man wat liedjies skryf en sing – ons nimlike Liedjieboer, Anton Goosen. Ons gaan saam op die reis deur sy grootwordjare in die Vrystaat tot waar hy vandag terugkyk op sy kleurryke lewe.
Al die soorte landdiere is in hierdie werk deur Louis Liebenberg verteenwoordig – amfibieë, reptiele, voëls en soogdiere, asook ʼn afdeling toegewy aan insekte. Die teks word toegelig met foto’s en diagnostiese tekeninge van die diere se spoor. In sommige gevalle is daar ook foto’s van die diere se mis en ander leidrade wat sal help dat mens die diere maklik kan identifiseer tydens ʼn uitstappie in die veld.
Sampioene – nog plant nog dier, maar eerder ‘n unieke groep organismes. Hulle kom voor in allerhande vorms, groottes en kleure, maar om hulle van mekaar te onderskei, kan moeilik wees. Hierdie kompakte, pragtig geïllustreerde gids is die ideale veldgids.
Hierdie is ’n eg Suid-Afrikaanse boek wat fokus op temas in die natuurwetenskap, tegnologie, ingenieurswese en wiskunde. Die doel is om die leser meer te vertel oor wetenskaplikes wat baanbrekerswerk verrig. As jy dus meer wil weet oor ons plaaslike uitvinders, planmakers en slimkoppe is hierdie net die boek vir jou.
